Ngopi Pait Bareng Abah Pepen: Pokir teh 'Eusi Otak', Lain 'Proyek Titipan' Lur!

Abah Pepen nganjang ka kantor Redaksi Majalah Perjuangan.

KARAWANG, (MP).– Poe Jumaah (10/4/2026) kamari, Kantor Redaksi Majalah Perjuangan dadak dadakan jadi haneuteun. Lain ku sabab aya nu menta sumbangan, tapi kasumpingan jawara opini urang Karawang, saha deui mun lain Abah Pepen.

Datang-datang, Abah geus langsung ngabodor. "Cing, cikopi hideung, tapi tong pait-pait teuing, ameh hirup urang Karawang teu milu pait ku urusan politik!" cenah bari seuri ngagakgak, nyieun suasana redaksi nu tadina hareudang ku deadline jadi ngagebray deui.

Sambil sila andékor, Abah Pepen mimiti ngabedah perkara nu keur rame diomongkeun: Pokir (Pokok-Pokok Pikiran) DPRD.

Pokir: Aspirasi Rakyat atawa Proyek "Bancakan"?

Abah Pepen nyuruput kopi bari rada mureleng. "Kieu barudak, ari Pokir teh kuduna mah eusi otak wakil rakyat urang. Meunang neangan pas keur reses, ngadengekeun rakyat nu jumerit hayang jalan alus atawa sakola bener. Tah, eta pikiran teh dijadikeun usulan pembangunan. Eta nu halal mah!"

Tapi, ceuk Abah, kontroversina teh pas eta "eusi otak" robah jadi "eusi pesak". 

"Nu matak lieur mah, Pokir teh sok dijadikeun 'proyek titipan'. Rakyat ménta solokan, eh nu turun malah pengadaan barang nu teu jelas, terus nu ngerjakeunana oge geus aya 'pengantin-na' alias kontraktor titipan Dewan. Tah, ieu nu disebut transaksional teh. KPK geus melotot bae tah!" ceuk Abah bari ngagibrigkeun leungeun.

Ulah Milu Ngurek Proyek!

Abah Pepen oge ngingetkeun, ulah nepika aya istilah "bancakan" anggaran. Ceuk aturan mah (Permendagri No. 86/2017), Dewan teh tugasna ngan saukur mawa aspirasi, lain milu ngatur teknis atawa milih saha nu kudu ngerjakeun proyekna.

"Dewan mah tugasna mikir, ari nu ngerjakeun mah bagean OPD atawa Dinas PU. Ulah kabeh hayang dirawu, engke buncirit! Jiga kasus di Kaltim geuning, ribut gara-gara Pokir dipangkas ku Pemprov. Mun murni keur rakyat mah moal kudu gidir atuh, bener teu?" Abah nanya bari nyesep ududna jero pisan.

Pantun Penutup ti Abah Pepen

Sateuacan amit mundur sabab aya janji cenah rek nempo anak incu, Abah Pepen masihan pantun (sisindiran) husus keur para wakil rakyat urang:

Meuli kupat di Pasar Johar,

Dituangna sareng sate bandeng.

Janten wakil rakyat sing ikhlas tur sabar,

Ulah mikiran wae proyek, bisi katewak KPK akhirna bubar.

"Pokona mah, Pokir teh kudu balik deui kana khitahna. Keur rakyat, lain keur bagi-bagi fee! Kahade ah, ulah nepika 'eusi otak' kalah eleh ku 'eusi beuteung'!" pungkas Abah bari pamit, ninggalkeun haseup kopi jeung obrolan nu kacida jero elmuna.

Tim Redaksi Majalah Perjuangan

Karawang, Jum'at, 10 April 2026